chmahon-vert

le picard vit, le picard se parle, le picard s'écrit...

02 juin 2010

un sapré printemps

Ch'Picard il est lo...
L'Tchulture picarde all'intéresse...
Nou Picardie a vit...

I gno qu'à vir ch'printemps qu'chés Dgiseus d'Boves pi ch'Mahon-vert is l'ont ieu !

canchon1

Cha o cminché par Dourlins, ch'Poèyis d'Charles Dessaint, ch'ti aveuc ses histoéres éd Florimond Long-minton... Lo, ch'étoèt por éne sérée picardisante organisée par ch'Lion's club... éne sérée d'infer ! par un bieu sanmdi d'avri, l'17...

12_dgise_alpine

Pi vlo qu'dins ch'moés d'moa, él 8... chés Matchés d'carettes il o follu qui s'lanch'nt dins chés jux picards... l'ASAN (chl'Achuchon éSportife dézz'Alpine du Nord) is sont vnus foère un rallye-pronmnate dins l'Vallée d'Selle pi dins ch'parc dé ch'Pré Porus... Por martcher des points, is dvoèt'nt té juer à chés jux picards pi seurtoute à l'dgise... Taper dins ch'biglet, a n'est point eussi aisié !...

mahon1

Chl'lin.nman, os étoèmes dins zz'hortillonnages, à Rivry, dins chl'Impasse Marcel... Jean-Ouis, chl'hortillon d'leune i fêtoèt ses 25 ans... soin, ch'n'est point sn'âge à li.. ch'est chés 25 ans dé sn'intérprinse éd gardinage... én biélle fête d'où qu'os avons ieu éd quoé dire pi baver !...

ouvrage

Après cho, ch'étoèt la fête mon chés Décatorneux d'hernu... chés gins d'Sant Saufieu... ch'sanmdi 15 éd moa, is sé sont értreuvés à l'salle des fêtes por éne sérée tout in picard qua nn'o foèt rigoler pus d'un !...

camp_d_so_le

Sous éne caleur du diape, ch'sanmdi 22 d'moa, ch'étoèt l'Fête éd la Nature à Fignières... d'où qu'i gno un si bieu larris... rindez-vous plache dé chl'églisse por éne tchote balade qui ramin.nro chés gins à ch'larris... lo, éne heure éd contes, d'histoéres dsur éch poèyis... minme dsur éch camp d'soéle !

jux1

Pi cha o té ch'marcrédi 26 éd moa... Tous chés jux d'traditions pi picards is l'étoèt'nt rachimblés à l'colonie d'Dury d'où qué ch'Denis Vitte i voloèt foère décovrir chés jux à chés join.nes éd chés CAJ d'Anmiens... Os n'avons point chômé mais nous érelles as nous fsoèt'nt du mau à vrèpes aveuc tout ch'buzin d'chés palets qui claqu'nt dsur chés planques éd bos...

h_ronni_re

In nsous un cié bien gris pi dé l'drache à mzure, ch'est à Camon qu'os nous sonmes étreuvés por él fête dé zz'hortillonnages ch'sanmdi 29 éd moa... Nous histoéres as parloètes seurtoute d'ieu, ch'est por cho qu'chés nuages is l'ont racontié les leurs d'histoéres... mais chés gins is l'étoètes té fin hureux !...

merisier

Pi i n'fudroèt point t'oblier, ch'trahal écminché in septinme 2009 pi qui continue tout chl'énnée éscolaire, à la Providence d'Amiens... Chés nazus dé l'classe "Merisiers"... os z'ons prins l'habitute éd dire "Dgigniers" finalmint... don chés nazus, in 5ème, is trahall'nt dsur des fablieux à leu mode... équ'tout cho cha vo t'ête mis in picard...

Vivmint chés bieux jors qu'os puchonches nous érposer... pasque ch'picard ch'est prénant... pi quand qu'cha vous prind, a n'vous tchitte pus !

Posté par chmahon-vert à 09:59 - Commentaires [0] - Permalien [#]

Commentaires

Poster un commentaire