L'Baie d'Sonme ch'est eussi cho...

Bin ouès, sovint, ch'est dé l'côte qu'os rbéyons l'Baie d'Sonme... mais, si qu'o z'est dsur un batieu, ch'n'est point du parel minme... pi ch'est probape por éne eute boin.ne cose...

Lo, os sonmes au Crotoy, à l'déchinte à batieux d'l'eute côté dé ch'port...

Li, ch'est Tonton Pat... éch capitain.ne, chl'éspéchialisse in cannes à pêque, in molinets, in mitraillettes pi tout cho...

Pi os savez qu'i sait étnir él barre... ch'est ch'pus boin éskipeur dé l'Baie...

Os avez vu écmint qu'il est bâti... ch'est por cho qu'i feut qu'i maque... i feut avoér des forches por tirer chés pissons dé l'ieu...

Mi, éj sus chl'ésgond dsur éch navire... mi eussi feut qué j'maque mais ch'est à coeuse équ'j'ai mn'éstoumaque un mollé fragile...

Seurtoute, ch'pus important in mér, ch'est dé n'point s'laissier déshydrater... Tonton Pat i pinse à toute !

Dins un batieu, i feut savoér cho qui sé passe à droéte  pi à gueuche... o dit à tribord pi à babord... pi seurtoute i feut savoér ouèche qu'is sont chés bancs d'macrieux...

Oh bin lo !... nn'in vlo éne tripotée qui naj'nt vers éch batieu... I n'feut point zzès ratier...

Man diu sangneur !... ch'est à gron.née qu'os zz'aheutchons... nous bros is n'in peuv'nt té pus... qué misère !

Incroéyape !... él soute a dédgeule...

Tonton Pat, sin père il étoèt chartchutier... alorse, ch'est li qui décoeupe tout cho... a prinro moins d'plache dins ch'coffe pi Manman a né ll'indgeulro point por avoér sali chl'évier...

Ah ouès !... quand qu'o vo à l'pêque, os avons toujours des sirin.nes aveuc nous z'eutes por néttier chés pissons...

L'temps d'foère tout cho, cha i est... os avons dérivé dusqu'à ch'Bourcq-éd-Eut...

Il est temps d'rintrer à coeuse qué ch'flot in Baie d'Sonme, cha vo vite... os porroèmes t'ête seurprins par él barre éd vagues...

Infan, nous vlo rintrés au Crotoy... os voéyez chés Tourelles dins ch'fond...

Bon bin os n'morrons point d'fam à chés corts jors... l'glacière all'est badgée d'macrieux...

Alorse, quoé qu'ch'est qu'os nn'in disez ?... all'est point biélle la vie in Baie d'Sonme !

Pi dvant d'rintrer à nou moèson... pi d'matcher tchèques macrieux à ch'barbatchu... i n'feut seurtoute point ratier ch'coutcher d'solè in Baie d'Sonme... ch'est ch'pus bieu du monde !

Comments

[mauricette cheva]

mi din l'nord j'ravisse, pi j'ravisse cor les bell' photos ké > y nou mé su l'ordi,un vrai régal.merci à li et bisous à tizautes tertouss mauri 7