Canalblog
Editer l'article Suivre ce blog Administration + Créer mon blog
Publicité
chmahon-vert
9 décembre 2010

Chés rin.nes dé ch'Père Noë

Ch_s_D_giseux_ed__Boves_001

Ch'est biétôt Noë... infan point coère tout à foèt l'heure, mais a vient...

i gno d'cho tchèques temps, Joël Bliaux, il avoèt écrit éne histoére dsur chés rin.nes dé ch'Père Noë !

Nous z'eutes chés Dgiseux d'Boves, os avoèmes trinsformé sn'histoére in téyate por éne sérée picardisante à Boves in 2007...

... pi aveuc ézz'événmints qui gno ieu cht'énnée-chi, durant chl'aprèzeut, bin, ch'conte éd Noë-lo, il est tout à foèt dins chl'actualité !

Prindez l'temps dé l'lire, ch'est nou cadieu d'Noë à tous chés matchés d'picard pi zz'eutes...

Chés rin.nes dé ch’Père Noé

 Scin.ne 1

04_p_re_no__m_re_no_

Père Noë - Bon voéyons un tchot mollé tchelle heure qu’il est ?... Dquoé ? déjo 9 heures du soér !... Mais ch’est qu’il est l’heure éd s’in aller pasqué l’neuit a s’in vo t’ête longue… Hé grand-mère ! d’où qu’ch’est t’os mis l’lisse éd chés éfants ?

Mère Noë - Bin all’est à s’plache éh bigleu !... lo dsur él drèche !

Père Noë - Ah bin ouès ! stcheuse-mé grand-mère Noë, mais tu sais bien qué l’24 déchinme au soér, éj sus t’un tchot mollé à cran. Bon vlo l’lisse aveuc chés noms d’chés nazus pi leus juets martchés in fache… (i rbéye à l’croésée)… Mais quoé qu’ch’est qu’is foèt’nt chés rin.nes attreupés plein mitan dé l’cor ?

Mère Noë - Bin jé n’sais mie mi !

Père Noë - Bon infan, j’m’in vos t’i aller… j’n’ai pus qu’à m’rhabiller !

Mère Noë - Ouès, vos–t’in conme cho pi j’té voés révnir dins ch’quart d’heure qui seuit. I sroèt temps qu’tu prinches étn’értraite !

05_liste_nazus

Père Noë - Ah bon ! à coeuse ?

Mère Noë - Pi ch’plan dé zz’écminées ! Ouèche qu’il est ch’plan dé zz’écminées ?

Père Noë - T’os rison grand-mère, sins ch’plan, ch’est seur qu’jé n’porrai point foère grand cose. Seurtoute dins chés quartiers d’Anmiens d’où qu’toute i cange d’éne énnée à l’eute… bon ouèche qu’il est ch’plan dé zz’écminées ?

Mère Noë - T’os vraimint pus d’tête… à tn’avis, des plans d’écminées, ouèche équ’cha put t’ête plaché quand qu’o z’o conme ti chl’Alzémér qua l’arrife ?

Père Noë - Bin jé n’sais mie, mi !

Mère Noë - Bin tout bêt’mint dsur l’poute dé chl’écminée, éh grand bête !

Père Noë - Ouès, ch’est vrai, jé ll’ai mis lo in disant qu’a sroèt pusse aisié dé ll’értreuver !... Ah ! llé-vlo… Bons chés lutins is l’ont cartché ch’trinieu… toute il est fin prêt… allez hop !... os z’y allons !

 Scin.ne 2 (Un houret i rinte tout déringé…)

Houret - Père Noë ! Père Noë !

Père Noë - Quoé qu’ch’est qu’i gno ?

Houret - Ch’est éne catastreuphe !

Père Noë - Ene catastreuphe ?... Os ons obié des nazus ? I gno point assiez d’juets ? Mais parlé-don cré vingt diux !

Houret - Pire équ’cho Père Noë !

Père Noë - Mais tu vux don m’foère avoér éne attaque, sapré ferlapier !

Houret - Chés rin.nes is sont in grèfe !

Père Noë - Ah ! ch’est don cho qu’jé zzès voés lo, décrinclés dé ch’trinieu pi ragrichon.nés dins chés neiches… Bon, cors ézzès tcheure por qu’i viénch’nt ém dire cho qu’i n’vo point.

Houret - Bien Père Noë, j’i vos.

Mère Noë - Bin quoé qu’ch’est qui leu arrife à tes rin.nes ?

Père Noë - Bin jé n’sais point… d’toute fachon, zzès vlo !

 Scin.ne 3 (Chés rin.nes is rint’nt dins l’moèson)

06_irruption_rin

Père Noë - Bon alorse, quoé qu’ch’est ti qui s’passe ichi ?

Mère Noë - Hep vous lo ! éne mineute… échuez vous pattes dsur ch’tapis dvant rintrer… o voét qu’ch’est point vous z’eutes qu’os fsez ch’pavé !... (is l’échu’nt leus pattes)…

Père Noë - Bon alorse, quoé qu’ch’est qu’os avez ?

Chés rin.nes - (chés rin.nes is parl’nt tértous insan.ne)… Bin vlo Père Noë, os n’sonmes point t’hureux !

Père Noë - Ah nan ! point tértous insan.ne, jé n’comprinds rien du toute. Os avez bien un délédgé ?

Délédgé - Ouès, ch’est mi Pére Noë… Os avons voté l’grèfe !

Père Noë - Nan mais, os êtes complét’mint débistratchés !... voter éne grèfe un 24 déchinme au soér !... os n’y pinsez mie ?

07_revendication

Délédgé - Justémint Père Noë, os avons bien érbéyé à l’tévision pi dsur la Terre… pi os avons comprins qu’éne grèfe, ch’est foèt por imbelmerder él pusse éd monde possipe… sins cho, i gno parson.ne qui froèt attintion à nous z’eutes.

Père Noë - Nan mais, cha n’vo point ?... os avez d’trop lapé pi d’trop matché tas d’halbrans !... Quoé qu’ch’est ti qu’os vulez ?... Tu t’rinds compte grand-mère ?

Mère Noë - Ouès, jé n’sais point cho qu’i leu prind ?

Délédgé - Os dmindons éne meilleure étreumeure pi pusse d’avéne…

Chés rin.nes - (is dgeul’nt)… Ed l’avéne !... éd l’avéne !

Père Noë - Ah ouès ! d’l’avéne !... pi quoé coére ?

Délédgé - Des glands éne foés dins l’ésmangne !... ch’est vrai cho, des glands, os nous nn’in don.nez janmoès!

Chés rin.nes - (is dgeul’nt)… Des glands ! des glands !

Père Noë - Des glands ?... Ouès, o voéro !

Délédgé - Nan nan Père Noé ! n’éfsez point conme tous chés moêtes én’disez point « O voéro ! »… Os avons écrit un contrat… si os né l’signez point, os n’nous écanill’rons point !

Père Noë - Pusse d’avéne… pi des glands !... mais os nn’avez janmoès assiez dins vous gargates tas d’dgeulus !... j’espère bien qu’ch’est toute ?

08_discussion

Délédgé - Nan, os vulons eussi un aménajmint dé ch’temps d’trahal !

Chés rin.nes - (is dgeul’nt)… Os vulons chés trinte chinq heures !... Partache dé ch’trahal !... du trahal por tout l’monde !

Père Noë - Dquoé ? os n’allez tout d’minme point m’parler d’chés trinte chinq heures ?... Os trahallez douze heures dins chl’énnée pi os z’êtes fatidgés tas d’tcheurfallis ?

Délédgé - Bon bin pusse équ’ch’est conme cho… os avons coére un nséquoé à rajouter.

Mère Noë - Eh lo vous z’eutes !... pinsez à sin tchoeur.

Père Noë - Mais os vulez m’foère moérir tas d’preupariens !

Délédgé - Os vulons eussi éne étchipe éd protection pasqué l’énnée passiée, dins chés binliues, o nous attindoèt !

Chés rin.nes - (is dgeul’nt)… Dé l’sétchurité !... dé l’sétchurité !

09_slogans

Père Noë - Ouès, j’comprinds, mais l’tornée a n’dure point longtemps vu qu’i gno point gramint d’écmindes… feut dire équ’chés nazus d’chés quartiers-lo, is n’croét’nt té point à grand cose pi coére moins à ch’Père Noé…

Délédgé - Pétête, mais durant qu’o vous attindoèt, bin i gno éne étchipe éd bros cassés qua l’o volu ragriper ch’trinieu… In intindant ch’buzin, chés cadoreux is sont arrivés pi is nous ont dmindé d’chirtchuler… Cha o té dur éd nous foère intin.ne… Pi os sonmes viux Pére Noë… cha foèt deux mille ans qu’os fsons ch’métier-lo… Cha sroèt normau qu’os éyonches nous pinsions !...

Mère Noë - Mais is n’sroèt’nt té point dévnus un tchot mollé totchés tes rin.nes ?

Père Noë - Ch’est vrai cho… l’pinsion achteure… Quoé qu’ch’est qué j’dirai mi ?

Délédgé - Bin os contineurez si qu’os vulez pi os n’érez qu’à imbeucher dz’apprintis !

Père Noë - Mouès, ch’est vrai qu’os êtes viux, vou poéil il est tout gris, vous ziux is sont cavés pi j’sins bien qu’vous pattes as dvién.n’nt té roèdes… Bon allez, don.nez-mé vou contrat, j’m’in vos l’signer… mais après cho, os avez intérêt à métte les bouchées doubes pasqu’aveuc vous histoéres, os sonmes in értard… Allez mes boins rin.nes, allons don.ner du bonheur à tous chés nazus !... Bon adé grand-mère Noë pi point d’bêtisses durant mn’absinche !

Mère Noë - Parlé-don éh ! viux machin… Adé pi prinds soin d’tin tchoeur !

 ridieu

Publicité
Commentaires
D
merci pou ch'biau conte ed Noé<br /> <br /> Bizz et in bon reste !<br /> Mamie Patou Roberte
Répondre
J
Salut Chmariel,<br /> Bravo pour "ches couleurs". Excellentes photos et bon esprit de "Ch Lafleur". Je me régale à chaque parution.<br /> jean paul
Répondre
Publicité
Publicité