chmahon-vert

le picard vit, le picard se parle, le picard s'écrit...

18 février 2011

des nazus pi du picard

Chés nazus dé chl'ergroupmint pédagogique d'Aubigneu, Busseu pi Vecquemont is sé sont mis à l'heure du Picard dvant dé s'rinde à l'sérée picardisante organisée par l'APERVAB... chl'Achuchon d'chés Pérints d'Eleufes dé chl'eRgroupmint Vecquemont-Aubigneu-Busseu...

Ch'est Mariel éch Baveu d'Boves qui leu o apporté l'boin.ne parole !

04_picard_mat

Ch'Lafeur il est minme évnu li prêter la man...

05_lafleur_mat

Sandrine a n'voloèt mie qué ch'brigand d'Lafleur i foèche capelle dins tous chés bistros... all'est vnue eussi por miler tout cho !

08_lafleur_sandrine_mat

Zz'éfants is l'ont posé leus tchuls à terre por acouter chés comptines qué ch'Baveu i leu disoèt in picard... pi cha zz'o gramint foèt rigoler dé zzès répéter...

09_comptines_mat

croque soéris rapasse par ichi

j'té baill'rai du pan musi

à ch'bout dé m'fourtchette

pi coére éd ieu à boére

croque soéris tout noére...

11_comptines_mat

à patte d'agache j'té voés par un gros treu

tu maques du flan pi du watieu

tu nn'in don.nes minme point un tchot morcieu...

10_comptines_mat

Après cho, Lafleur pi ch'Mariel is l'ont traversié ch'collidor por aller foère un coucou à chés nazus dé ch'CP...

03_lafleur_cp

Ene foés qué ch'cabotan il o répondu à chés tchestions dé zz'éfants, ch'Mariel is leu o raconté éne histoére, chtolle d'un nazu d'leu âge : Titou... qui s'o értreuvé dins ch'roéyonme éd chés ténébes...

  "Ch’Titou, ch’étoèt un éfant, point pusse boin pi chértain.nmint point pusse pire qué zz’eutes. J’vous l’dis, ch’Titou ch’étoèt un garchon bladjeu pi farcheu conme is peut’nt tértous él l’ête à sn’âche. Lò d’où qu’il étoèt l’pusse terribe, ch’est quand qu’i s’méttoèt à foère inrager és’sœur. Por cho, paure tchote, i li in fsoèt vir des vértes pi des point mûres : i s’in alloèt dins ch’gardin, il attrapoèt des béstioles à pattes pi à z’ailes pi i zès flantchoèt dins sin cou ou bien ses cavieux… ch’est conme cho qu’il eusoèt s’tchote sœur tout in rigolant conme un gros béta..."

03_lafleur_cp

Cho foèt, ch'est à l'grande école qu'chés rodailleus is leu ont értreuvé...

Après avoér acouté s'véritabmint vraie histoére qué ch'Lafleur i leu o racontié...

14_lafleur_ce_cm

...ch'est aveuc éch Titou qu'is l'ont foèt con.noèchinche mais ch'coeup-chi, ch'est eux-minme qui l'ont lu chl'histoére dé sapré nazu...

15_picard_ce_cm

"Margré cho, ch’étoèt un boin fiu, chés paures bêtes, janmoès i né z’èscofioèt, nan ch’étoèt seumint por foère des farches, mais… ch’malheur dins tout cho, ch’est qu’i z’oblioèt… ouès ! i z’oblioèt.

    Dins l’moéson, point éne tchote boête, point un tchot pot, point un tchot tchube d’où qu’o n’déteupe un vér éd terre tout sè, un calémichon ramonchlé au fin fond dé s’cotchille, un papillon tout crispé, éne érignée rincrintchée à ch’couverque… Minme éne foés, éne tchote guérnoulle infreumée dins un titchot porte-mon.noèe rose !…

16_picard_ce_cm

Maginez chés cris dé l’tchote sœur (ch’Titou i nn’éroèt pissié dins s’maron.ne) pi chés ziux dé l’paure seuteuse d’pus l’temps qu’all’étoèt prison.nière pi sins solè ! Z’érpreuches pi z’indjeulades dé s’mère is n’i cangeoèt’nt rien… ch’étoèt à pein.ne ingvallé qu’il érméttoèt cho l’lin.nman..."

17_picard_ce_cm

Mais cho qui l'o gramint foèt rigoler chés nazus, ch'est quand qu'leus moêtresses as l'ont té invoyées à ch'tabieu por lire él fan dé chl'histoére... à sé dminder tchèche éd chés éfants ou bien d'chés grandes parson.nes qui l'étoèt él pusse aisié à lire du picard...

17_picard_instits

un boin monmint ch'est seur dins l'jornée dé zz'écoles dé chl'ergroupmint Vecquemont-Aubigneu_Busseu...

Posté par chmahon-vert à 19:50 - Commentaires [1] - Permalien [#]

Commentaires

  • Ch'bétal ed Mariel, y n'peut point s'déchatcher d'ech l'école ...
    Y n'peut point s'in passer !

    Amiteuzmint

    Ch'Titi ed'Tchayeux

    Posté par vdn, 21 février 2011 à 22:30

Poster un commentaire