chmahon-vert

le picard vit, le picard se parle, le picard s'écrit...

28 juin 2011

du picard à ch'collège

Des bouzrés dins conme qui diroèt éne salle d'éspéctaque...

01_crdp_pro

Ah !... gno eussi des grandes gins... i nn'o minme un qui flime por FRANCE 3 !

Bon tchèche qu'i gno :

ch'caméraman o n'sait mie sin nom... l'fenme ch'est Sylvie Iacono dé ch'CRDP pasqu'os sonmes à ch'CRDP... drière d'elle, ch'barbu, ch'est Jean-Marie Braillon, un picard éd Quiérache... à côté ch'est Bertrand Cuvelier, ch'Pérzidint dl'APP (Aginche Por éch Picard)... coére à côté, ch'est Philippe Boulfroy, un Picard édl'Oése... à côté coére, ch'est Jean-jacques Stoter dé ch'Consel Générau d'la Sonme... i manque dsur él photo France Avisse éd l'APP (j'espère qu'a n'm'in vudro point)...

02_jury

A coeuse qu'is sont lo tous chés gins lo ?... à coeuse qu'i gno ieu ch'Concours dé ch'Picard au Collège pi qu'ch'est ch'Palmarès...

03__cran

Béyez vlo Bertrannd Cuvelier qui don.ne chés résultats...

04_jury3

Ch'est chés nazus dé ch'Collège Compère Morel éd Breteul qui l'ont gangné ch'1er prix...

2ème ch'Collège César Franck d'Anmiens

3ème exaequo ch'Collège Rose des Vents d'Frivi-Querbotin pi ch'Collège Philéas Lebègue éd Marselle in Bieuvaisis

05_laur_ats

Chés nazus is l'ont ieu des cadieux offerts par chés Consels dé l'Région pi seurtoute, i gn'avoèt éne boête éd pâté d'carabirèche... ch'est cho qué ch'barbu i tient dins s'man... ch'est rare du pâté d'carabirèche presqu'eussi rare qué d'rincontrer un dahut dsur ch'mont roussi d'Ailly sur Sonme... por chl'érchette i vut miux vir aveuc éch Jean-Marie Braillon !

06_carabir_che2

Chés nazus d'La Providence d'Anmiens is l'étoèt'nt lo... infan chétlos qui n'étoèt'nt point partis rodailler por éch voéyage éd fan d'énnée... is l'ont fini à l'7ème plache mais ch'est eux qui l'ont foèt él pus bielle vidéo d'Croédur pi Lafleur... o porrez pétête él vir biétôt.

07_lapro1

Après ch'classmint, chés nazus dé ch'Collège César Franck is l'ont canté éne canchon in picard... aveuc Joël Dufresne, ch'canteu picard...

08_tourqu_not

... l'canchon, ch'est chtolle dé "L'séminche éd chuque" coére dit "l'canchon dé ch'Tourquénot"... ché paroles os zz'avez dsur éne eute page dé ch'blog.

09_tourqu_not2

Lo, os voéyez dz'éfants ébeubis d'intinde...

10_lapro2

...  él minme canchon... cantée in duo par éch Joel Dufresne pi ch'Flipe Boulfro coére dit chl'ernu... un grand monmint !

11_duo

Ch'concours dé ch'Picard au Collège cha o bien plu à tous chés nazus qui ll'ont foèt... is sont minme érpartis aveuc un bieu ticheurte martché :

éch français, ch'est ch'perlache dé m'bouque

mais ch'picard ch'est ch'ti d'min tchoeur !

12_ticheurte

Après l'chérémonie, tous chés nazus is sé sont értreuvés dins l'pièche d'à côté ouèche qu'un goûter i zz'attindoèt...

13_go_ter1 14_gouter2 15_gouter4

 

 

O puvez m'croére qu'is nn'ont prins éne boin.ne panchie...

 

Posté par chmahon-vert à 19:50 - Commentaires [2] - Permalien [#]

Commentaires

    Ein bieu traval éd ti avüecq chés joèn.nes....
    Adé
    Flipe Boulfro

    Posté par boulfroy philipp, 29 juin 2011 à 07:37
  • Hello vous z'autes ,
    j'vos qu'min comarate Jean Louis I-est toudis là pour féliciter eul z'infants, ch'est bin .
    J'am'ros bin avoir eul musique de l'canchon de" l'seminche eud chuque" pou mi l'tchanter aussi... ch'est possibe?
    Merci pou vos bielles paches ed blog que j'ai quer d'arwetti . Mais quo qu'ch'est des nazus ? j'sus in.ne vielle picarte ( 84 ans) ed près eud Tournai alors alfos euj treufe des différinces énon!

    Bizz à bètôt Roberte .

    Posté par duchatelet rober, 02 juillet 2011 à 12:23

Poster un commentaire