chés ponmes d'Ailly chl'Heut Clotcher
Un doégt qui monte éch cié
conme i disoèt Chateaubriand...
vlo chl'église Notre-Dame éd l'Assomption
dé ch'Xvème sièque
d'Ailly chl'Heut Clotcher...
Lo, os n'sonmes point dins l'nef...
mais dins éne salle polyvalente drière chl'école dé ch'poèyis...
pi i gno un monde du diabe...
à coeuse don ?
L'réponche all'est déhiors...
ch'est l'Fête éd chés ponmes
pasque dins l'temps...
i gn'avoèt granmint d'ponmiers dins chés pâteures...
in rintrant,
o voét rondibillis éd quoé qu'i s'agit...
deux tabes badgées d'ponmes
éd tous les formes
éd tous les couleurs
éd tous les tchoins d'Picardie pi d'ailleurs...
o n'put mie s'bérleurer in rbéyant dins chés pangniers...
des Colleville normandes
des Jumbo
des Pieux d'tchiens
des Reinettes éd Franche-Comté
pi tout l'diabe sins tran...
Biéseur
o zi coeupe point d'chés raches éd ponmiers...
pi d'tous zz'intalles point possipes por foère pousser tout cho...
Un éstand bien visitié...
ch'ti dé ch'chide pi dé l'goutte...
pur jus fabritché par
Patrick Périmony
à Blargies dinns l'Oése...
un mollé pus loin...
un éstand dsur un végétau
qui l'érprind du poéille éd la bête...
est-ti point bieu un boutchet conme cho ?...
aheutché à chl'écminée...
ch'est dl'euthintique cho !
un mollé pus loin...
un fouillis du diabe dsur éne tabe...
des bouts d'morcieux d'bos...
éstchultés..
des gambes
des tiêtes
des bros...
a sroèt-ti qué ch'décoeupeu in série
dé ch'quartier Sant Leu i sroèt lo ?...
Bin ouès
ch'est li...
éllé-vlo ch'tailleu d'cabotans
Jean Pierre Facquier...
o put rincontrer
ch'Traite
ch'Porichinelle
ch'Prinche
pi minme éch Pinocchio aveuc sin long nez
pi éne tralée d'eutes person.nages...
mais chti qui l'est él pusse érmartché...
ch'est Lafleur...
qui n'sé gin.ne point
por distribeuier sin chirop d'cleus d'galoches !
Durant ch'temps-lo
in-nsous l'pleuve qu'a n'arrête point d'tchèr...
Jean-Marie François
i raconte édz'histoéres éd brigands
à chés gins qui foèt'nt éch tour dé zz'hayettes aveuc li...
à vrèpes
tous chés visiteus i s'rassan.n'nt
por mier un rpos picard foèt
éd fichelle picarde
éd bisteu
éd rabote
tout cho arrosé aveuc du chide biéseur...
conme ch'est l'Fête éd chés ponmes
éne éfant dé ch'poèyis
Micheline Waquet
coére dit Mimimouse
a raconte à chés gins
cmint qu'a s'passoèt du temps d'chés bouilleus...
pi tout cho in picard !
pi por métte un tchot mollé d'imbiénche
ch'est ch'canteu picard
Joël Dufresne
qui l'o insoéyé dé s'foère intinde
dins ch'buzin foèt par chés fourtchettes...
sonme toute
éne Fête dé ch'térroér pi d'chés ponmes réeussie...
Vivmint chl'énnée tchi vient !