23 avril 2012
picard à Conty
ch'picard i s'est invité
à chl'école Jeanne d'Arc éd Conty
ch'mardi 3 d'avri...
i gn'avoèt lo Camille, Julosse pi ch'Romain
dz'élèves dé ch'CM1 qui foèt'nt du picard
aveuc chés Dgiseus d'Boves...
Titine él Routchine pi Florence...
pi mi ch'Baveu mais por él photo-chi
j'étoès drière chl'appareil...
zz'éfants dé chl'école is sé sont plachés au pusse près...
pi cha o cminché...
ch'Baveu il o d'abord foèt montrer chés cabotans
pi il o insoèyé d'foère dire des mots picards à chés nazus...
après
Camille, Julosse pi ch'Romain
is sé sont mis à plache
por présinter éne tchote pièche éd Jean-Marie braillon
"chés gueufes"
des nazus qui s'in.neuit'nt
is déchid'nt éd foère éne marmiton.née d'gueufes...
por cho is déball'nt toute dins ch'cafornieu...
pi por foère chés gueufes
i leu feut
dé l'frain.ne, du lit, du beurre, dé l'crinme etc...
pi por don.ner du goût
vu qu'i gno point d'élvure
is s'in vont ajouter un bouillon tchube...
Manman a n'est point hureuse éd vir ch'brun-lo...
a leu don.ne des ratons... dsur leus tchuls...
pi a vut zz'invoéyer joutcher...
mais vlo Matante qua l'arrive...
"quoé qu'ch'est qu't'os dins tin panier ?
qu'is s'édmind'nt chés nazus...
"ch'est dé l'soupe à l'oégnon"
qua rintinque Matante...
finalmint
in nsous ch'torchon
chés nazus is décach'nt éne marmiton.née d'gueufes...
ch'est por mier à vrèpes...
chés nazus is sont fin contints
minme équ'chés gueufes à Matante
ch'est miux qu'chés ratons à Manman...
après zz'appleudissmints
éne tchote pause...
zz'éfants is l'acout'nt ch'Baveu leu parler d'La Fontaine...
zz'éfants is con.noèss'nt bien cht'honme-lo...
pi eussi és'fabe "le corbeau et le renard"
mais lo
is s'in vont intinde él fabe éd Charles Lecat
"él cornalle pi chl'érnard"
qua n'é s'passe point tout à foèt du parel minme
équ'dins chtole à La Fontaine...
ichi chl'érnard i s'rin iro dins sin treu, berdoulle...
à coeuse équ' "chés cornalles d'achteure
as l'ont gramint involué"...
in attindant l'darin.ne histoére
tindisse qué ch'Romain i foèt vive ch'Lafleur
ch'Mariel i raconte justémint l'vie dé ch'Lafleur...
pi l'séinche a sé finiro aveuc él rinconte
dé chl'Ernard pi dé ch'Tchot Prinche
qué ch'Baveu il o mis in picard...
"si tu vux un anmi... apprivoése-mé"
un monmint magique !...
chés nazus dé chl'école is s'in sont rin allés dins leus classes
fin hureux...
merci à Isabelle por él salle
pi à ch'Cyrille por chés photos
03 mars 2012
ch'gardin d'chés vertueux (2)
Allez, o contineue ch'voéyage dins ch'gardin d'Paco...
(por ézz'images in pusse grand, clitchez édsur)
ichi, on pinse à tous chés moénieux... i gno point crise dé ch'lojmint !
Néanderthal il éroèt minme pu vnir visiter ch'gardin...
il éroèt décaché éne cahutte tout qu'i gno d'pusse nateurel...
Por és rinde dins ch'fond dé ch'gardin...
ch'est simpe...
os seuivez ch'teunnel éd seules...
pi soin à vous dé n'point réveiller ch'mammouth in osier in sortant...
Bon os sonmes dins un gardin fintastique...
i gno dz'us qui vol'nt par édsur des man.nes à voéle...
édz'us coucounés par chés dinosaures tchèche qui sait !
Elvez bien vous caouètes... zz'abes is l'apprin.n'nt él géographie... dins chl'espache biéseur !
pi por vous nn'in sortir dé ch'gardin fintastique, i vous feudro seuire vou boin.ne étoéle...
22 février 2012
ch'gardin d'chés vertueux
(por vir chés photos in pusse gros, clitchez édsur)
Ene ardoése à chl'intrée d'un buchon...
ch'Gardin d'chés Vertueux...
un indroét calme, rimpli d'ieu...
aveuc chés riux à lintilles, bordés par chés têtards...
à mzure, éne barque muchée lo por foère bieu...
un liu calme, in ville, puqu'o dvine chés moèsons dé l'Queuchée Ferry d'Anmiens...
Dins ch'fond dé ch'gardin un honme, otchupé à sin poêle, à foère tchuire des seupes à chitroulle...
ch'est Paco, ch'gardinier vertueux qu'o put acouter à ch'poste, à France Bleu Picardie, l'diminche édvant chl'offiche...
Dins sin gardin, chés carrés, ch'est des trianques...
chés chitroulles as l'ont un tchot nom : ichi "Matthieu" conme min tchot fiu !
chés choux fleurs is l'ont des grandes feulles...
pi chés choux verts is pouss'nt diréctémint dins chés pangniers...
Bon, por él seuite dé l'visite, cha sro dins l'prochain.ne page dé chl'ésmangne prochain.ne...
01 février 2012
picard dsur scin.ne
Toc Toc Toc...
Toc Toc Toc...
Toc...
Toc...
Toc...
Tiens ch'Lafleur i s'prépare...
ch'Lafleur i s'foèt bieu...
Bin ouès !
sanmdi 28 éd jinvier,
ch'étoèt l'sérée picarde éd chés Dgiseus d'Boves...
pi Lafleur il étoèt d'la fête...
I fsoèt froéd déhiors mais coeud in-ndins...
L'salle all'étoèt plein.ne à cratcher
pi ch'est qu'chés gins is l'ont bien éscoué leus panches !
Os purrez vir chés photos ch'prochain coeup !
(Grand marchi à tchot Jean por chés photos)
24 janvier 2012
chés nazus d'chés dgiseus
A sro ti la seuite por quand qu'nous z'eutes os n'sront pus lo ?... tchèche qui sait !
por bien vir chés photos, os clitchez édsur.
Infan, vlo don chés nazus éd Chés Dgiseus d'Boves... in plein trahal éd picard... in route à lire pi à apprinde leus rôles por él prochain.ne sérée picardisante...
L'tchote nazuse lo au-dsur, ch'est Camille...
Ch'tchot nazu fin blond, ch'est Romain...
Chtilo qui l'est in route à foère ésn'intéressant, ch'est Jules mais os ll'avez pétête édjo vu chl'énnée passiée...
Bon, i n'foèt point qu'des beudézries... os savez cha trahalle sarieusmint pi dins l'boin.ne humeur !
Mais i gno point t'à dire...
chés files ch'est quand minme pusse attintion.née dins sin trahal pi ch'est moins érmuant !
Bon chés nazus éd Chés Dgiseus d'Boves...
os zzès rtreuvrez dsur l'scin.ne
dé l'Salle éd chés fêtes éd Boves
à l'Sérée picardisante
dé ch'28 dé ch'moés jinvier 2012.
Os puvez coére réserver vous plaches
in téréphon.nant à ch'Mariel
03 22 09 23 20
19 janvier 2012
él sérée dé ch'28 éd jinvier
cho qu'os purrez vir él 28 éd jinvier...
"chés gueufes"... avec chés nazus dé chl'achuchon
"à ch'burieu"... éne histoére éd boêtes à puches
"mon ch'troudutchutologue"... éne histoére éd sinté
"élchon d'conjudjaison"... aveuc chés nazus dé chl'achuchon
"chés fonction.naires"... rien à dire
"ézz'us d'grand-mère"... conme éne confession
"Lafleur pi Croédur"... éne histoére d'héros picards
"chl'érprésintant"... éne histoére dépossiérée
i gnéro seurmint éne tchote canchon,
du chide pi du watieu battu
droét d'intrée : 5 uros
por réserver téréphon.nez à ch'Mariel
03 22 09 23 20
ché conmédiens dé l'sérée d'jinvier 2011
13 janvier 2012
Sérée picardisante à Boves
Cha i est, os sonmes in 2012...
Ch'est ch'monmint d'foère él plein d'rigolade...
dvant dé n'pus t'avoér qu'nous ziux por braire !
Conme tous zz'ans, Chés Dgiseus d’Boves
is sroèt'nt fin hureux d'vous rchuvoér
dins l'Salle d'chés Fêtes éd Boves
l'28 dé ch'moés d'jinvier 2012 à 20 heures 30
por leu novelle sérée picardisante…
«du Téyate éd brun conme à l’habitute»
Progranme dé l'sérée
Por canger, os allons taper dsur ch'dous :
d'chés fonction.naires, dé zz'héros picards, d'chés viux, d'chés vieux, d'chés jon.nes, d'chés médçans, d'chés malades, dé zz'éfants, d'leus parints, d'leus matantes, d'chés vindeus d'aspirateurs, dé zz'acateus, d'chés moêtresses d'écoles, dé zz'éleufes, dé zz'éspectateurs...
dsur tout ch'qui bouge !
Os frons pusse pire équ'miux !
Os puvez réserver vou plache in invoéyant un tchot mot dsur chl'arnitoéle aveuc éch nombe éd gins qu'os srez... pi in invoéyant vou chèque (droét d'intrée : 5€/parson.ne) à :
Guise et Traditions
1 rue du Commandant Jan
80440 Boves
03 22 09 23 20
chl'étchipe dé l'sérée 2011
05 janvier 2012
chés vux por chl'énnée 2012
Chl'énnée 2012 a s'in vo ti foère édz'étinchelles ?...
cha n'risque dgère pasqu'a minque d'heuile dins chés rouaches !
infan, nous z'eutes à ch'mahon-vert,
cho qu'os sohètons ch'est qué...
l'TVA sochiale a déchinde éd 6 points...
conme cho, os porrons rimplir nous gaves
pi boère cho qu'i feut
por seuver nous princhipales indeustries...
pi érmonter chés finances éd la France !
28 décembre 2011
seurprise BMW
BMW... ch'est allmand... ch'est solide !
L'eute jor, in montant por rétchupérer m'poubelle, j'ai ieu éne tchote seurprise...
Ch'n'étoèt point conme à l'habitude... i gn'avoèt un nséquoé d'point normau !
Ch'est vrai quoé... chés boueus is n'tchitt'nt mie janmoès l'poubelle joutchée... pi chés carettes as sé gar'nt toujours conme i feut !
In s'approchant un tchot mollé, jé m'sus dit qu'il avoèt dû és'passier tchèque cose dins l'neuit...
Des BMW, ch'est putôt du lusque !... chtolle qua l'étoèt dsur ch'trottoér a n'avoèt mie pus d'sins...
L'mécanique a sortoèt dé ch'capot...
L'calinde all'étoèt dsur ch'trottoér...
In s'garant, ch'queuffeu il avoèt aheutché ch'potieu pi cha fsoèt éne plieure à chés portières...
Mais ch'pus drôle, ch'est qu'il o follu foère évnir éne dépanneusse... ch'est lo qu'j'ai comprins qu'il avoèt dû i avoér un ac.chidint !
pi lo, j'ai ieu éne pinsée por min voésan... quand qu'j'ai vu qué ch'mur qu'il avoèt mis tant d'ardeur à foère monter bin... il étoèt achteure in bos...
éne pinsée por ti Régis !
Chés troés gins qui l'étoèt'nt dins l'carette is n'édvoèt'nt point t'ête bléssiés vu qu'is sé sont inseuvés !
13 décembre 2011
éne histoére naturelle
Minou IV, ch'cot dé l'moèson i rinconte éne soéris...
Gintimint, i l'rapporte à l'moèson...
Ch'est cho qu'i feut...
quand qu'i foèt fin coeud...
pi qu'o n'sait mie quoé foère...
jusse un tchot coeup d'patte conme cho por vir...
Ah !... llé-vlo qua s'muche ...
ouès mais, j'sus lo mi... éj mile !...
bon, j'foès san.nant d'dormir por vir éd quoé qu'all'est capape...
mais ch'est qu'all'est ésportive él grignoteusse-lo !...
a n'vo quand minme point grimper tout in heut d'bite in bout ?...
sié, llé-vlo aheutchée à ch'plafond... ch'est prexe dévnu éne catsoéris !...
bon assiez jué... mi j'té rapporte à t'moèson !