chmahon-vert

le picard vit, le picard se parle, le picard s'écrit...

07 octobre 2017

 

dé ch'14 à ch'17 éd septimbe 2017,

à Vérone in Italie,

 

i gno ieu ch'Festivau d'chés jux inchiens pi d'rue...

cho, por él tchinziénme foés !

(ch'point blanc por foère montrer chl'indroét dé ch'terrain d'ju

plache Viviani, in plein chinte dé ch'Vérone historique...)

 viviani vérone lippa

 

Chés Dgiseus d'Boves is l'ont té invitiés

à chimpion.nat uropéen éd Lippa...

un ju qui l'érsan.ne un mollé à ch'Ju éd dgise !

ch'est conme cho équ'Titine él Routchine, Mariel ch'Baveu d'Boves, Juju, ch'Ludo pi chLaurent

 

lippa picardie1

 is l'ont défindu chés couleurs éd la Picardie

conte ézz'étchipes italién.nes éd Vérone, Milan, Mede

mais eussi conte chtolle éd Pola in Croatie

chétolles dé l'Fédération éd Slovénie pi d'Pirano in Slovénie

chétolles éd Roumanie pi d'Hongrie

pi minme chtolle du Sri Lanka...

 

01 a tableau participants

chés Dgiseus is n'ont point démérité puqu'is l'ont fini à l'9iénme plache...

minme qu'is l'ont prins rindez-vous por éch Festivau éd 2018

adoù qu'is pins'nt à batte tous chés chimpions dé chl'ésport éd rue...

 

lippa participants

 

ichi éne partie d'chés jueus...

i manque chés roumains !

 

01 match martine milan

éne phase éd ju :

attaque éd Milan, définche éd Titine

 

18 grosse attaque

 

éne phase éd ju périlleuse...

chés picards is né ll'ont point bielle !

cho qué ch'Baveu d'Boves il o asplitché à ch'Pérzidint dé ch'Festivau

Giorgio Paolo Avigo...

tout cho in Picard italien

 

entretien mariel président agacha o té dur éd s'adapter à ch'matriel, ch'terrain pi chés règues...

si tant eutes équ'chétlos dé l'dgise in Picardie...

guise et lippain heut, ch'ju d'dgise éd Picardie

in bos, ch'ju d'lippa éd Vérone...

 

chés Dgiseus is vodroèt'nt qué ch'Ju éd Dgise i fuche pusse con.nu...

Ch'Baveu d'Boves il invite tous chés gins qui vodroèt'nt énn'in savoér éd pusse, à vnir taper dins l'dgise.

por cho

os n'avez qu'à dminder pi os vous don.nrons éne date por "intrer dins ch'ju" avec chés Dgiseus...

Association Guise et Traditions

1C rue du Commandant Jan 80440 BOVES

0667191339 – guisetraditions@yahoo.fr

Posté par chmahon-vert à 18:38 - Commentaires [1] - Permalien [#]

03 septembre 2017

Dgise internation.nale

guise2

 L'dgise... ju picard

dins chés bassins textiles pi miniers

dé l'Sonme, dé ch'Pos d'Calais pi dé ch'Nord ?...

conme ichi aveuc éch Jéronme éd Boves qui l'est in route à batte...

ou bié conme échtilo in-nsous qui foèt du parel minme !

Lippa-Mede-2-768x500seuf qué chtilo, ch'est un dgiseu éd Mede...

un tchot poèyis d'Lombardie, fin prés d'Pavie in Italie !

Pandolo-na-Mediteranu-2017-drugi-dan-izbor-23-768x500ou bié chétlos in route à mesurer chés points aveuc él batte...

équ'ch'est des jueus d'Croatie ou bié dé Slovénie...

S-cianco-768x500coère échtilo qui bot

tindisse qué zz'eutes is l'insoèy'nt d'arrêter ch'caterlet...

pi ch'coeup-chi, os sonmes à Vérone...

tzurca atttindez

lo, i gno un jueu qui l'insoèye éd gober l'dgise

por débatte éch lanceu...

ch'qu'i feut savoér ch'est qu'ch'est des roumains... p1010001Alorse

éch ju éd dgise l'est ti européen ?

in Italie, ch'est él lippa ou bien scianco, à mzure ciaramela...

in Croatie, c'est l'pandorlo...

in Hongrie, ch'est l'bige...

in Roumanie, ch'est l'turcà...

o porroèt ajouter qu'in Wallonie, ch'est l'brichte...

 

éj n'in rviens point mi-minme...

ch'est por cho,

qu'éne étchipe éd Dgiseus d'Boves

a s'in vo foère éch chimpion.nat uropéen éd lippa,

là-bos, à Vérone

chés 16 pi 17 éd septimbe...

Is l'éront-ti l'médalle ?

à vir !

 

Posté par chmahon-vert à 09:19 - Commentaires [0] - Permalien [#]

08 février 2017

prochaine soirée picardisante

cochon

 Acoute, acoute !

sanmdi 11 dé ch'moés d'mars 2017

évnez don à l'Salle éd Fêtes éd Boves...

 

dgiseu 2017

 chés Dgiseus d'Boves

is s'in vont vous métte

du picard dins vous érelles...

 photo affiche

 Hommage à Coco

Coco (Colette Bonnay)...

a nous o tchittée in 2016…

all'étoèt d'chés preumes à ch'début dé chl'avinture in 1994...

all’o écrit dins L’Gazette éd chés Dgiseus...

chés Dgiseus is lirons deux textes :

Cht’honme qui fsoèt des seurprises

pi L’pêque miratchuleuse (un mollé téyatralisé)...

A tchèche éch tor

éne tchote pièche putôt déjintée :

Os vous rtreuvarez dins l’salle d’attinte

d’un canbinet d’arracheu d’dints...

Intraque

Ch’quart d’heure picard

aveuc du chide pi du watieu battu...

Ch’coéchon d’Lafleur

Lafleur, Sandrine, Tchot Blaise, Titine, Papatchutchu pi ch’Cadoreu

is s’in vont avoér à rfoère aveuc un Coéchon...

Pi à mzure

Os finirons par éne tchote canchon…

 

Posté par chmahon-vert à 14:13 - Commentaires [0] - Permalien [#]

31 janvier 2017

couleurs d'hiver à la Réserve de Boves

cha i est,

ch'temps i s'o radouchi

mais...

chl'esmangne passiée, cha n'étoèt point du parel minme...

ch'froéd il étoèt lo !

ch'qui foèt équ'feute d'aller à la mer

chés Matcheus d'gueugues is l'étoèt'nt évnus in nombe

à l'Réserve dé chl'étang Sant Lade éd Boves...

por preuve

19 parkingéch tas d'carettes garées dsur chés parkingues

dé l'Réserve pi dé chl'étang Sant Nicolas...

20 parkingRmartchez

ch'décor i valoèt ch'déplachmint...

05 rosellièrel'roselière a passoèt par tous chés couleurs..

06 batrollestindisse équ'chés batrolles as fsoèt'nt leus fiértchuls...

08 ru glacési qu'os avoètes ieu chl'invie d'foère éne tchote glinchade

09 ru glacé os éroètes pu insoyer dsur chés rus...

10 ru glacé mais soin à n'point tchèr dsur vou tchul pi broéyer l'glache...

11 rosellire flottanteun tchot molé pus loin, l'roselière flottante...

14 intallepi chés couleurs éd l'hiver dins ch'joutcher d'solè...

BOVES 04-02-2017l'glache all'éro fondu mais...

conme dit dsur l'réclame

os puvez découvrir L'Réserve éd Boves

Sanmdi 4 éd févérier...

i gno mie pus qu'à vous inscrire !

à s'vir

 

 

 

 

 

 

Posté par chmahon-vert à 11:30 - Commentaires [0] - Permalien [#]

30 mars 2016

ch'Bieu temps dl'Indeustrie à Ailly-Sonme

Ailly-Sonme l'o con.nu

él 5 dé ch'moés d'mars 2016

un Bieu Temps dl'Indeustrie point conme ézz'eutes

un tchot mollé frèque déhiors

mais coeud dins chés tchoeurs...

duo01

 is l'étoèt'nt éne chinquantain.ne éd gins à seuire

ch'Jean-Paul pi ch'Mariel, chés deux baveus d'sarviche

por décovrir ou ardécovrir l'Fabrique éd jute Carmichaël...

d'abord dins chés bâtimints dé chl'eusine

pi après, in s'pronmnant dins ch'poèys dsur chés pos dé zz'ovriers...

 cour01

rindez-vous l'o té don.né dins l'cour dé l'fabrique

qua l'o vu passer pi rapasser

un mont d'fileus, tisseus, tcheudeuses, paqu'teus

pi tout ch'diabe sins train 130 ans durant...

 

bureaux

ch'est dvant chés burieux d'chés patrons

qu'is s'rindoèt'nt à leus atéiers

pi soin

i n'folloèt point oblier d'értirer

sin béret ou s'castchette por ézz'honmes

éd saleuer dé s'tiête por chés fenmes

quand qu'is rincontoèt'nt chés patrons pi chés dirigeus...

carmichael-3

i gnavoèt d'abord él filateure pi l'cordrie

ouèche qu'il éfsoèt éne caleur du diabe...

ch'Jean-Paul i nn'o profité por asplitcher

cmint qu'chés bâtimints is l'avoèt'nt té constreuits...

 filature13

tindisse qué chmariel li

il asplitchoèt écmint qué zz'ovriers

is trahalloèt'nt dins un parel atmosphère...

 filature06

l'filateure, ch'étoèt des ringées éd métiers

qui marchoèt'nt jor conme neuit

por fabritcher du fil éd jute, ed canve, éd lin

pi dé l'corde éd sisal...

métier à filer

filature

cho qui l'o él pusse impression.né chés visiteus,

ch'est chl'atéier éd tissage...

minme qué ch'Jean Paul il étoèt ébeubi

in racomparant aveuc éch tissage Saint Frères éd Flichcourt...

tissage01

lo coére, ch'Jean Paul il o asplitché

cmint qu'des parels bâtimints

is l'avoèt'nt té constreuits...

in racomparant aveuc chés techniques

équ'chés Carmichaël is l'avoèt'nt rapportées d'Ecosse...

tissage22

chMariel il o asplitché chl'infér

équ'ch'étoèt dins chl'atéier

aveuc l'caleur

ch'busin d'chés métiers

chés navettes qua clatchoèt'nt

chés pions qui voloèt'nt...

tissage03

éne navette éd métier rectilligne...

maginez ch'busin quand qu'o pinse qu'i gnavoèt

des dizain.nes pi des dizain.nes éd métiers...

tissage13

ichi un sac à ponméterres foèt dins dé l'toéle

mis in forme par éne tcheudeuse à seurjet...

tissage12

chés métiers à tisser rectilignes...

tissage rectilign

chés métiers à tisser chirtculaires

tissage circulaire

l'toéle tissée a s'in alloèt in gros roulieux dins l'monde intier...

éne eute partie a passoèt dins chl'atéier d'chés tcheudeuses

lo-in.nsous à ch'2inme nivieu...

pi chés sacs is déchindoèt'nt à ch'1er nivieu

por t'ête imprimés pi mis in patchets...

pi is déchindoèt'nt à ch'sous-sol

por t'ête pressés, stotchés...

ch'est lo qu'chés wagons pi chés camions

is cartchoèt'nt l'toéle pi chés sacs

por érjoin.ne Nantes, Bordeaux pi Marseille...

couture

dins chl'atéier d'chés tcheudeuses

à ch'1er plan, deux "grosses" pitcheuses...

à ch'2inme plan, chés seurjetteuses...

dins ch'fond, chés "tchotes" pitcheuses...

atelier de couture

l'visite dé l'fabrique éne foés finie,

ch'Jean-Paul pi chmariel is l'ont inmné chés gins

dsur chés pos dé zz'ovriers

dins ch'village

mais ch'est éne eute histoére...

cités10

don à ch'prochain coeup por ézzés seuire !

Posté par chmahon-vert à 10:02 - Commentaires [0] - Permalien [#]

24 février 2016

Carmichaël, paysage d'Ailly-sur-Somme

cha vo t'ête éch "Printemps dl'Indeustrie"

él 5 dé ch'moés mars

à Ailly-dsur-l'Sonme...

 

allez

pleins fux dsur ch'qui resse dé zz'Etablichminnts Carmichaël...

12 fond

l'fabrique vue d'chés camps d'béttraves dé ch'platieu...

10 cités au loin

chés prémières chités fin prés dé l'voée d'écmin d'fer Paris-Boulongne...

09 les casernes

à droéte, chés chités dites "chés casernes" dé zz'énnées 1900...

à gueuche, chés chités dé zz'énnées 1890...

 07 usine et pont

 ch'pont qui l'o tout cangé dins ch'quartier...

 06 1ères cités

 chés prémières chités dé zz'énnées 1870...

 01 passerelle

 l'passrelle qua l'o rimplaché ch'passage à nivieu dins z'énnées 1950...

 04 tissage

à gueuche, chés bain-douches...

vue dsur chés toéts dé ch'tissage...

 03 tissage

drière l'Sonme pi chés marais...

 02 couture

 édvant, chl'atéier d'couture pi chés magasins...

dins ch'fond, l'cordrie pi l'filature...

 

évnez découvrir tout cho pi ch'resse

sanmdi 5 éd mars à 14h15

dins l'balade urbain.ne dé ch'Printemps dl'Indeustrie...

aveuc Jean-Paul GRUMETZ

pi CHMARIEL...

rindez-vous rue dl'usine

à chl'intrée dé l'fabrique...

 

por én'nin savoér éd pusse

chmariel 06 67 19 13 39

offiche éd tourisse d'Ailly

por réserver

03 22 51 46 85

Posté par chmahon-vert à 09:11 - Commentaires [0] - Permalien [#]

13 janvier 2016

2016 démarre

chés Dgiseus d'Boves

is démarr'nt leu novelle énnée

conme tous zz'ans

avec leu sérée picardisante à Boves...

programme :

Mossieu l'Maire - Ch'cailleu d'Lafleur - Aristide à Paris

n'mantchez point d'riserver vous plaches

por cho os voéyez aveuc chMariel 06 67 19 13 39

ou par mèle : chmarield@yahoo.fr

affiche

Mais tchèche don chés Dgiseus d'Boves

por chl'énnée 2015 ?

t'es d'min coin

ch'est un passage dins chl'émission d'France Bleu

"T'es d'min coin"... aveuc ch'Françoés Morvan...

DSC02156

ch'est du téyate in picard à Boves

mais soin, du téyate éd brun...

DSC04672

DSC04689

ch'est eussi du téyate in picard

invitié par Tchot Gleude Varlet éd Monsures...

05 explication

ch'est un atéier picard

aveuc chés nazus éd Terminale

dé ch'Lychée Sant Riquier d'Anmiens...

49 bousculade

ch'est éne sérée téyate in picard

aveuc ézz'élèves éd terminale

dé ch'Lychée Sant Riquier d'Anmiens...

08 pause

ch'est des balades dins nou  bielle région

conme in Baie d'Sonme par eximpe...

DSC03633a

 DSC03698a

 DSC03751a

DSC03716a

ch'est ch'Son pi Leumière éd Rouvrel

por chés textes in picard, chés bindes son

pi l'mise in plache éd chés jux...

N_20150802 a

ch'est des balades contées in picard

dins l'réseve nateurelle éd Boves

dins chés bieux jours...

 P1040187a

 P1040228a

 ch'est eussi éne jornée d'rinche

dins ch'Poèyis d'Parmentier

aveuc pique-nique,

histoéres pi contes éd diabes pi d'soeurettes in picard...

IMG_4343

ch'est un trahal aveuc chés gins dé l'com éd com d'Ailly dsur Sonme

por prisinter zz'inciens établichmints Carmichaël...

DSC04643

 PB100029

ch'est un rapprochmint aveuc chés gins d'Ailly dsur Sonme

por és'raminteuver dé ch'temps Carmichaël...

mais

ch'est eussi du trahal dsur él langue picarde...

chés Dgiseus is l'écriv'nt des contes

por chés balades contées...

chés Dgiseus is l'écriv'nt des tchotes pièches

por chés sérées picardisantes...

Posté par chmahon-vert à 15:40 - Commentaires [0] - Permalien [#]

29 décembre 2015

à la poursuite de Carmichaël

une petite visite des lieux courus d'Ailly...

01 dvant l'garel'gare...

ch'est lo qu'tous chés join.nes is leu rtreuvoèt'nt

por prinde éch tran d'7H au matan por aller à ch'lycée

pi

por déchinde dé ch'tran d'7H à vrèpes in révnant dé ch'lycée..

04 mairie-écolechl'école conmeunale...

ch'est lo qué chés join.nes d'avant dgerre

is l'eusoèt'nt leus patalons dsur chés clantcheus...

in.nhui, ch'est l'moèrie pi tous chés sarviches dé l'conmeune...

08 rotondel'crèche Carmichaël...

ch'est lo qu'tous chés bouzrés is vnoèt'nt

temps qu'leu parints is l'alloèt'nt trahaller à l'fabrique (Carmichaël)...

in-nsous l'boin.ne warde éd Manmzelle Rosensthiel pi Manzelle Mathiot...

09 bureaux directeurschl'usine Carmichaël...

ch'est lo  qu'tous chés gins d'Ailly is vnoèt'nt user leus doégts

por éch pus grand bien d'chés patrons : Mossieu Vandevanter pi Mossieu Bonneville...

11 cité et patronnagechés chités Carmichaël...

ch'est lo qué zz'ouvriers dé l'fabrique is restoèt'nt

dins chés moèsons qu'chés patrons is l'avoèt'nt foèt constreuire por eux...

19 cmin catieucho ch'est chl'écmin qui min.ne à ch'Catieu Carmichaël

route éd Saveuse...

Olga all'étoèt toujours adeussée à ch'mur dé s'moèson d'gardién.ne...

20 ch'muret ch'muret...

o l'voét coére route éd Saveuse... i don.ne dsur él Nationale...

ch'est lo qu'tous chés gins dé ch'quartier is leu rtreuvoèt'nt au boin temps pour foère la parlotte...

22 mont roussich'Mont roussi...

un écmin point possibe qui permettoèt éd joinde "ch'village" à "par in heut d'Ailly"...

soin dins zz'énnées 50, ch'étoèt un écmin d'cailleux fin danjureux qu'chés nazus is l'adoroèt'nt déchinde à toutes bérzingues...

28 dgisech'ju d'dgise...

o n'put point parler d'Ailly sins parler dé ch'ju d'dgise...

tous chés nazus is juoèt'nt à cho, chés garchons eussi bien qu'chés files...

31 tchoin ruchech'tchoin d'la Ruche...

tous chés jon.nes gins is leu rtreuvoèt'nt lo por poser leus tchuls...

por attinde él déchinte dé ch'train

ou por attinde és'tchote poulette

ou tout bêtmint por distchuter intér copains...

30 60ème ri

l'rue dé l'Briqutrie...

inhui rue du 60ème RI...

ch'est lo qu'j'ai usé mes fonds d'patalon pi gratigné mes gnoux...

mais ch'est éne eute histoére !

Posté par chmahon-vert à 14:50 - Commentaires [4] - Permalien [#]

23 novembre 2015

Marché de Noël d'Amiens 2015

Por chés Fêtes éd Noë

passiez don par Anmiens

Martine pi Mariel is vous propos'nt leu cambe d'hôtes...

  lechemindulphe

 

marche4

ch'Martché d'Noë d'Anmiens il ouve ses portes

dé ch'20 d'novimbe dusqu'à 30 éd déchimbe...

moéyen pour chés visiteus éd découvrir l'Capitale picarde...

éd pinser à chés cadieux por Noë

éd minger pi boére alintor éd chés chalets illeuminés...

 marche 1 marche2

marche3 marche5

én'mantchez point d'passier par éch tchai Bélu

dins ch'quartier d'Sant Leu...

queue de vache queue de vache2

pi à vrèpes

d'évnir vir él cathédrale in couleurs..

couleur cath1 couleur cath2

sins oblier él Tour Perret illeuminée...

tour perret

amiteusmint pi à s'vir

lien Martché d'Noë : http://www.marchedenoel.fr/

lien Cathédrale : http://www.amiens-cathedrale.fr/home.html

 

 

Posté par chmahon-vert à 19:10 - Commentaires [1] - Permalien [#]

04 novembre 2015

Friche industrielle d'Ailly-sur-Somme

Rinconte aveuc chés Gins d'Ailly dsur chl'histoére dé l'Fabrique Carmichaël

Mardi 10 éd novimbe 2015 à 20H

Salle Polyvalente rue Pierre Brossolette à Ailly dsur l'Sonme

carmichael-1

Rencontre publique avec les citoyens sur l’histoire du site Carmichaël

Le mardi 10 Novembre 2015 à 20 heures

Le site Carmichaël est l’un des symboles d’Ailly-sur-Somme. Cette ancienne usine a largement contribué au développement de la commune et à sa vie économique, faisant aujourd’hui de ce site un élément patrimonial identitaire et architectural fort de la commune.

Pour évoquer les grandes années de Carmichaël, mais aussi la relation que les Aillygeois peuvent avoir avec cette friche aujourd’hui, la Mairie d’Ailly-sur-Somme et la CCOA* vous invitent à participer à une rencontre publique sur l’histoire du site Carmichaël, le mardi 10 Novembre à 20h, à la salle polyvalente d’Ailly-sur-Somme, rue Pierre Brossolette.

Lors de cette soirée, une brève présentation sur l’historique du site Carmichaël sera réalisée par Mademoiselle Ols, chargée d’études stagiaire à l’ADUGA*, et par Monsieur Lecryt, chargé de mission à la Communauté de Communes Ouest Amiens.

Suite à cette présentation, les personnes présentes auront l’occasion de prendre la parole pour s’exprimer et se remémorer des souvenirs de vie autour de l’usine. Il sera également possible pour les participants d’évoquer leurs sentiments sur cette friche aujourd’hui.

Nous vous attendons donc nombreux le mardi 10 Novembre à 20h, à la salle polyvalente d’Ailly-sur-Somme pour cette rencontre autour de la mémoire de la commune et tenter de la transmettre aux nouvelles générations.

*CCOA : Communauté de Communes Ouest Amiens

*ADUGA : Agence de Développement et d’Urbanisme du Grand Amiénois

pano usine3

Posté par chmahon-vert à 09:18 - Commentaires [2] - Permalien [#]