24 janvier 2012
chés nazus d'chés dgiseus
A sro ti la seuite por quand qu'nous z'eutes os n'sront pus lo ?... tchèche qui sait !
por bien vir chés photos, os clitchez édsur.
Infan, vlo don chés nazus éd Chés Dgiseus d'Boves... in plein trahal éd picard... in route à lire pi à apprinde leus rôles por él prochain.ne sérée picardisante...
L'tchote nazuse lo au-dsur, ch'est Camille...
Ch'tchot nazu fin blond, ch'est Romain...
Chtilo qui l'est in route à foère ésn'intéressant, ch'est Jules mais os ll'avez pétête édjo vu chl'énnée passiée...
Bon, i n'foèt point qu'des beudézries... os savez cha trahalle sarieusmint pi dins l'boin.ne humeur !
Mais i gno point t'à dire...
chés files ch'est quand minme pusse attintion.née dins sin trahal pi ch'est moins érmuant !
Bon chés nazus éd Chés Dgiseus d'Boves...
os zzès rtreuvrez dsur l'scin.ne
dé l'Salle éd chés fêtes éd Boves
à l'Sérée picardisante
dé ch'28 dé ch'moés jinvier 2012.
Os puvez coére réserver vous plaches
in téréphon.nant à ch'Mariel
03 22 09 23 20
19 janvier 2012
él sérée dé ch'28 éd jinvier
cho qu'os purrez vir él 28 éd jinvier...
"chés gueufes"... avec chés nazus dé chl'achuchon
"à ch'burieu"... éne histoére éd boêtes à puches
"mon ch'troudutchutologue"... éne histoére éd sinté
"élchon d'conjudjaison"... aveuc chés nazus dé chl'achuchon
"chés fonction.naires"... rien à dire
"ézz'us d'grand-mère"... conme éne confession
"Lafleur pi Croédur"... éne histoére d'héros picards
"chl'érprésintant"... éne histoére dépossiérée
i gnéro seurmint éne tchote canchon,
du chide pi du watieu battu
droét d'intrée : 5 uros
por réserver téréphon.nez à ch'Mariel
03 22 09 23 20
ché conmédiens dé l'sérée d'jinvier 2011
13 janvier 2012
Sérée picardisante à Boves
Cha i est, os sonmes in 2012...
Ch'est ch'monmint d'foère él plein d'rigolade...
dvant dé n'pus t'avoér qu'nous ziux por braire !
Conme tous zz'ans, Chés Dgiseus d’Boves
is sroèt'nt fin hureux d'vous rchuvoér
dins l'Salle d'chés Fêtes éd Boves
l'28 dé ch'moés d'jinvier 2012 à 20 heures 30
por leu novelle sérée picardisante…
«du Téyate éd brun conme à l’habitute»
Progranme dé l'sérée
Por canger, os allons taper dsur ch'dous :
d'chés fonction.naires, dé zz'héros picards, d'chés viux, d'chés vieux, d'chés jon.nes, d'chés médçans, d'chés malades, dé zz'éfants, d'leus parints, d'leus matantes, d'chés vindeus d'aspirateurs, dé zz'acateus, d'chés moêtresses d'écoles, dé zz'éleufes, dé zz'éspectateurs...
dsur tout ch'qui bouge !
Os frons pusse pire équ'miux !
Os puvez réserver vou plache in invoéyant un tchot mot dsur chl'arnitoéle aveuc éch nombe éd gins qu'os srez... pi in invoéyant vou chèque (droét d'intrée : 5€/parson.ne) à :
Guise et Traditions
1 rue du Commandant Jan
80440 Boves
03 22 09 23 20
chl'étchipe dé l'sérée 2011
05 janvier 2012
chés vux por chl'énnée 2012
Chl'énnée 2012 a s'in vo ti foère édz'étinchelles ?...
cha n'risque dgère pasqu'a minque d'heuile dins chés rouaches !
infan, nous z'eutes à ch'mahon-vert,
cho qu'os sohètons ch'est qué...
l'TVA sochiale a déchinde éd 6 points...
conme cho, os porrons rimplir nous gaves
pi boère cho qu'i feut
por seuver nous princhipales indeustries...
pi érmonter chés finances éd la France !
28 décembre 2011
seurprise BMW
BMW... ch'est allmand... ch'est solide !
L'eute jor, in montant por rétchupérer m'poubelle, j'ai ieu éne tchote seurprise...
Ch'n'étoèt point conme à l'habitude... i gn'avoèt un nséquoé d'point normau !
Ch'est vrai quoé... chés boueus is n'tchitt'nt mie janmoès l'poubelle joutchée... pi chés carettes as sé gar'nt toujours conme i feut !
In s'approchant un tchot mollé, jé m'sus dit qu'il avoèt dû és'passier tchèque cose dins l'neuit...
Des BMW, ch'est putôt du lusque !... chtolle qua l'étoèt dsur ch'trottoér a n'avoèt mie pus d'sins...
L'mécanique a sortoèt dé ch'capot...
L'calinde all'étoèt dsur ch'trottoér...
In s'garant, ch'queuffeu il avoèt aheutché ch'potieu pi cha fsoèt éne plieure à chés portières...
Mais ch'pus drôle, ch'est qu'il o follu foère évnir éne dépanneusse... ch'est lo qu'j'ai comprins qu'il avoèt dû i avoér un ac.chidint !
pi lo, j'ai ieu éne pinsée por min voésan... quand qu'j'ai vu qué ch'mur qu'il avoèt mis tant d'ardeur à foère monter bin... il étoèt achteure in bos...
éne pinsée por ti Régis !
Chés troés gins qui l'étoèt'nt dins l'carette is n'édvoèt'nt point t'ête bléssiés vu qu'is sé sont inseuvés !
13 décembre 2011
éne histoére naturelle
Minou IV, ch'cot dé l'moèson i rinconte éne soéris...
Gintimint, i l'rapporte à l'moèson...
Ch'est cho qu'i feut...
quand qu'i foèt fin coeud...
pi qu'o n'sait mie quoé foère...
jusse un tchot coeup d'patte conme cho por vir...
Ah !... llé-vlo qua s'muche ...
ouès mais, j'sus lo mi... éj mile !...
bon, j'foès san.nant d'dormir por vir éd quoé qu'all'est capape...
mais ch'est qu'all'est ésportive él grignoteusse-lo !...
a n'vo quand minme point grimper tout in heut d'bite in bout ?...
sié, llé-vlo aheutchée à ch'plafond... ch'est prexe dévnu éne catsoéris !...
bon assiez jué... mi j'té rapporte à t'moèson !
29 novembre 2011
à chl'école éd chés Ouins-Ouins
Dins ch'moés d'octobe, zz'éfants dé l'classe éd CM2 dé chl'école éd chés Deux Vallées d'Boves is l'ont foèt ch'pos por apprinde leu troésième langue...
Biéseur, ch'est justémint ch'Baveu d'Boves qui s'o attatché à ch'trahal-lo...
Il o érprins ahite ses gestes éd quand qu'il étoèt maristér...
Zz'éfants is n'ont point pus foère eutérmint qué dé l'admirer... Seurtoute quand qu'il o cminché à parler in picard pi écrire in picard... mais cho qui zz'o coére pusse ébeubis... ch'est quand qu'il o dessiné in picard (tout chés gins is n'sait'nt point foère cho !)...
Lo, ch'est éne sérpe... os ll'avoèt'nt ércon.nue...
Sérpeux pi Jureus... ch'est ch'blason, éch seurpitchet dé ch'gins d'Continchy... is coeupèt'nt pétête gramint d'bos pi is juroèt'nt quand qu'is leu coeupoèt'nt un doégt ???
Sandrine qua l'avoèt foèt ch'déplachmint, all'o asplitché qu'chés gins d'Continchy, is trahalloèt'nt éch bos.. ch'pusse con.nu ch'est Mossieu Cardon qui l'o foèt l'flèque dé l'cathédrale d'Anmiens... pi qu'in boins poèyisans qu'is l'étoèt'nt, chés Continchynoés is disoèt'nt gramint éd gros mots !
Ch'Lafleur i n'étoèt mie in resse... rindez-vous compte, il o préféré vnir saluer chés join.nes putôt qué d'attinde à ch'café PMU dé l'rue Victor Hugo...
Alorse, ch'Baveu, Sandrine pi ch'Lafleur is l'ont asplitché à chés join.nes...
...qu'is l'étoèt'nt des Ouins-Ouins, des Pieds Porris pi des Brûleus d'Bouzots...
ch'est chés seurpitchets... o dit coère blasons éd chés Bovoés... chés seurnoms qu'chés gins d'chés poèyis dé zz'alintors is leu don.n'nt pour és'foute d'eux !
Chés Pieds Porris... à coeuse équ'Boves il est bâti dsur un grand marais pi qu'chés gins is viv'nt leus pieds dins chl'ieu...
chés Brûleus d'Bouzots... à coeuse équ'Boves ch'étoèt ch'poèyis d'chés vaques pi qu'dins chés pâteures, o treuvoèt gramint d'bouzots... chés gins is zzès ramassoèt'nt, is zzès fsoèt'nt sétchir pi à chés corts jors, is zzès brûloèt'nt dins leus poêles por leu queuffer...
Infan, chés Ouins-Ouins... à coeuse qu'à Boves i gno gramint d'fréctéme pi dé ch'coeup-lo, is sont souvint inchifernés (is l'ont leu nez prins)... pi quand qu'is rincont'nt tchéqu'un, is dmind'nt :
"Cha vo-ti bien ?"...
l'eute i rintinque :
"ouin ouin !"
infan tout cho, cha o bien plu à zz'éfants qui sont restiés fin sages dsur leus bancs...
...à sé dminder si qu'o n'duvroèt point métte éch Picard obligatoére in deuzième pi porquoé point in prémière langue dins zz'écoles !
10 novembre 2011
éne biocoop à Anmiens
In 1982,
éne coopérative Biocoop a s'ouve dins l'friche industrielle
à ch'L°219 dé l'route d'Adville à Montières (Anmiens)...
In 2002,
chl'Olivier pi l'Karen is l'racat'nt por foère éne SARL Biocoop...
In 2006,
is déménaj'nt à ch'L°505 dé l'queuchée Jules Ferry d'Anmiens por foère él Biocoop d'Anmiens...
In 2007,
is freum'nt él boutique dé l'route d'Adville...
In 2012,
is déménajront à ch'L°84 dé l'route d'Anmiens à Dury por rintrer dins un bâtimint tout neu à basse consonmation...
L'Biocoop à Dury, cha sro :
- éne éd chés 320 boutiques Biocoop éd d'la France
- éne boutique d'alimintation bio pi d'prodeuits écologiques
- éne boulinge bio
- éne pièche por chés soins esthétiques
in conclusion,
un magasin ouèche qu'o put foère ses conmissions in véritabe consonm'acteur !...
Dins ch'nouvieu bâtimint, toute il est foèt por optmiser chl'énergie pi chl'inviron.nmint.
chl'Olivier il asplique
qu'i n'puvoèt point foère eutérmint qué d'bâtir éne éco-construction...
pi foère montrer qu'étoèt possipe in racomparant aveuc ézz'hypermartchés...
pi qué constreuire un bâtimint basse consonmation énergétique, ch'étoèt aller dins ch'boin sins, dins ch'respect d'la Terre pi dé zz'Honmes...
qu'i feut toute foère por tchitter un boin héritage à nous éfants...
Ch'bâtimint i sro por és'pus grande part in bos...
l'caleur dé ch'four à pan a sro rétchupérée...
chl'énergie dé ch'groupe éd froéd a sro rétchupérée...
toute i sro foèt por rétchupérer tous zz'énergies possipes...
Dins ch'moés d'octobe,
i gno ieu l'visite éd chintier...
i fsoèt un temps du diabe... à n'point mette un tchien déhiors !
aveuc chl'érprésintant dé l'ville éd Dury...
Un tchot tchoin d'paradis conte un tchoin d'parapleuve...
Bon i gno ieu un coup à boére por réqueuffer chés tchoeurs...
os nous rvoérons por chl'ouvérture in 2012 !
21 octobre 2011
ch'matcheu d'gueugues
Chés Matcheus d'gueugues, ch'est ch'surpitchet dé zz'Anmiénoés... à coeuse qu'is sé sont foèts avoér par ézz'Espagnols durant l'Dgerre éd Trinte ans, i gno d'cho un sapré bout d'temps !
Des matcheus d'gueugues, i nn'o tout partoute... i nn'o minme un qui l'arpinte min gardin tout long du jour vu qu'il est tapissé d'gueugues qui nn'in finit'nt té point d'tchèr seurtoute aveuc éch vint qu'os avons dins chés prémiers jours éd l'aprézeut...
il est telmint bieu ch'bétal-lo qué j'n'ai point mantché dé l'photographier in route à foère sin trahal !...
un étchureul cha court éd droéte pi d'gueuche...
pi chés gueugues, as né l'ont point belle !
qué bielle pose !... ch'est por él photo..
des gueugues, i nn'o des chintain.nes...
ah !... n'in vlo éne à min goût...
Ahite, i feut qu'jé l'cange éd plache...
Bon vlo un bieu tchoin...
Allez, éj déheute un treu...
pi jé l'muche én-ndins...
Ej tasse un tchot mollé...
bon parson.ne dé ch'côté-chi..
Parson.ne dé ch'côté-lo... j'm'in vos nn'in rcacher éne eute !...
mais soin, chés gueugues as n'intéress'nt point qu'ézz'étchureuls...
vlo un bétal à pleumes qui sé nn'in mêle...
un jacques droét dsur ses pattes...
pi i n'est point évnu tout seu... il o sorti és'jacotte...
j'ai comprins... i vo folloér qué j'foèche ahite à rintrer chés gueugues si qué j'vux foère du watieu pi soégner mes vértèbes !
30 septembre 2011
un tchoin d'Picardie
Os con.noèssons la Picardie par ses 3 départémints : l'Aisne (02), l'Oése (60), l'Somme (80)...
l'grande provinche historique ch'est bien pusse équ'cho...
mais por cho, i feut con.noète la Picardie linguistique...
Ch'Pas d'Calais (62) i nn'in foèt partie... pi dins ch'Pas d'Calais i gno éne sous-préfecteure qua s'appelle Montreuil sur mer... un vrai tchot poèyis picard !
"Fidelissima picardorum natio"
ch'est cho qu'il o dit Henri IV in chl'énnée d'grâche 1606 in parlant d'Montreul dsur l'mer...
ch'qui vut dire : "La plus fidèle nation des Picards"...
Alorse, vlo don un bieu tchot tchoin d'Picardie...
Ene foés grimpé dsur ch'térte, o décache él campagne...
chés muralles éd cran, d'briques pi d'grès as sont coére imposantes...
o put foère ch'tor dé l'ville par éch sintier d'warde dsur él muralle pi par éch sintier in bos d'chés muralles...
dé ch'côté nord, o tchè dsur l'chitadelle pi ch'catieu... conme tout partoute, chest Vauban qui sé nn'est otchupé...
Montreul, ch'est du vert dins vous ziux... aveuc tous zz'abes, tout chl'hérpe, tous chés buchons qui l'intour'nt él ville...
Montreul ch'est eussi du rouge aveuc chés briques éd chés moèsons pi chés teuiles dsur chés toéts...
i foèt boin s'pronmner dins chés tchotes rues fleuries qua min.n'nt à chés rimparts...
du rouge pi coére du rouge por chés toéts...
mais eussi du gris por ézz'ardoéses dé l'Chartreusse dé l'Neuville muchée dins chés fonds dé l'vallée dé l'Canche...
mélinge éd bricaillons, d'briques, d'moéllons, d'cran, d'grès por chés murs...
chl'horizon i porte fin loin... pi conme dins gramint d'tchoins d'Picardie, o n'put mie écapper à chés funqu'ries d'écminées pi... dpus tchèques temps, à zz'ailes dé zz'éolién.nes...
O z'est tellmint bien à Montreul dsur l'mer qu'chés rintchill'ries as fleuriss'nt, ch'qui foèt l'bon.nheur éd chés papillons...
Alorse, un diminche qu'os avez chl'invie d'foère éne tchote rinche...
allez à Montreul, os nn'in prindrez plein vou ziux !