Ailly-Sonme l'o con.nu

él 5 dé ch'moés d'mars 2016

un Bieu Temps dl'Indeustrie point conme ézz'eutes

un tchot mollé frèque déhiors

mais coeud dins chés tchoeurs...

is l'étoèt'nt éne chinquantain.ne éd gins à seuire

ch'Jean-Paul pi ch'Mariel, chés deux baveus d'sarviche

por décovrir ou ardécovrir l'Fabrique éd jute Carmichaël...

d'abord dins chés bâtimints dé chl'eusine

pi après, in s'pronmnant dins ch'poèys dsur chés pos dé zz'ovriers...

rindez-vous l'o té don.né dins l'cour dé l'fabrique

qua l'o vu passer pi rapasser

un mont d'fileus, tisseus, tcheudeuses, paqu'teus

pi tout ch'diabe sins train 130 ans durant...

ch'est dvant chés burieux d'chés patrons

qu'is s'rindoèt'nt à leus atéiers

pi soin

i n'folloèt point oblier d'értirer

sin béret ou s'castchette por ézz'honmes

éd saleuer dé s'tiête por chés fenmes

quand qu'is rincontoèt'nt chés patrons pi chés dirigeus...

i gnavoèt d'abord él filateure pi l'cordrie

ouèche qu'il éfsoèt éne caleur du diabe...

ch'Jean-Paul i nn'o profité por asplitcher

cmint qu'chés bâtimints is l'avoèt'nt té constreuits...

tindisse qué chmariel li

il asplitchoèt écmint qué zz'ovriers

is trahalloèt'nt dins un parel atmosphère...

l'filateure, ch'étoèt des ringées éd métiers

qui marchoèt'nt jor conme neuit

por fabritcher du fil éd jute, ed canve, éd lin

pi dé l'corde éd sisal...

cho qui l'o él pusse impression.né chés visiteus,

ch'est chl'atéier éd tissage...

minme qué ch'Jean Paul il étoèt ébeubi

in racomparant aveuc éch tissage Saint Frères éd Flichcourt...

lo coére, ch'Jean Paul il o asplitché

cmint qu'des parels bâtimints

is l'avoèt'nt té constreuits...

in racomparant aveuc chés techniques

équ'chés Carmichaël is l'avoèt'nt rapportées d'Ecosse...

chMariel il o asplitché chl'infér

équ'ch'étoèt dins chl'atéier

aveuc l'caleur

ch'busin d'chés métiers

chés navettes qua clatchoèt'nt

chés pions qui voloèt'nt...

éne navette éd métier rectilligne...

maginez ch'busin quand qu'o pinse qu'i gnavoèt

des dizain.nes pi des dizain.nes éd métiers...

ichi un sac à ponméterres foèt dins dé l'toéle

mis in forme par éne tcheudeuse à seurjet...

chés métiers à tisser rectilignes...

chés métiers à tisser chirtculaires

l'toéle tissée a s'in alloèt in gros roulieux dins l'monde intier...

éne eute partie a passoèt dins chl'atéier d'chés tcheudeuses

lo-in.nsous à ch'2inme nivieu...

pi chés sacs is déchindoèt'nt à ch'1er nivieu

por t'ête imprimés pi mis in patchets...

pi is déchindoèt'nt à ch'sous-sol

por t'ête pressés, stotchés...

ch'est lo qu'chés wagons pi chés camions

is cartchoèt'nt l'toéle pi chés sacs

por érjoin.ne Nantes, Bordeaux pi Marseille...

dins chl'atéier d'chés tcheudeuses

à ch'1er plan, deux "grosses" pitcheuses...

à ch'2inme plan, chés seurjetteuses...

dins ch'fond, chés "tchotes" pitcheuses...

l'visite dé l'fabrique éne foés finie,

ch'Jean-Paul pi chmariel is l'ont inmné chés gins

dsur chés pos dé zz'ovriers

dins ch'village

mais ch'est éne eute histoére...

don à ch'prochain coeup por ézzés seuire !

ch'Bieu temps dl'Indeustrie à Ailly-Sonme

Partager cet article