Baie de Somme
Quand qu'i gno un tchot monmint... si qué ch'temps il est au bieu pi minme à mzure au gris, ch'est vers él Baie d'Sonme qu'os nous in allons !
Rindez-vous compte, éne baie qu'i nn'o point deux conme cho dins l'monde, dins l'galaxie, dins chl'univers...
Alorse, avec él boête à images in bindoulière, os rdécachons cho qu'os con.noèssons par tchoeur... à l'habitute, ch'est d'chés tchais d'Sant Wary qu'a s'passe... bin lo, ch'est in plein mitan dé chl'estuaire qué j'vous inmin.ne...
D'abord, toute il écminche lo, in aval... infan, cha cminche 245 tchilométes pus heut, à Fonsomme... mais por él baie, ch'est ichi... à zz'écluses d'où qué chl'ieu douche pi chl'ieu d'mer as s'mélinj'nt...
I suffit éd torner sin dous por décovrir eute cose... lo, ch'est la mer, éch port éd plaisinche, chés tchais pi dins ch'fond la Manche qua san.ne si tant loin...
A pein.ne rintré dins l'baie, ch'est éne mer d'hérpes qua vous atcheulle, chés mollières, éch sabe, él terre is sé sont tchittés insmincher...
Mais du sabe, i nn'o coére, o n'in mintchons point... du bieu sabe, bien gris pi bien fan... du sabe éd nou poèyis...
Un désert éd sabe aveuc ses tchots ridins pi à mzure chés flaques...
Ech sabe qué chflot il éstchulpte, aidié por cho par éch vint qui pousse chés grans dsur ézz'oyats pi tous zz'hérpes qua l'invahich'nt toute...
El mer, des foés maouèse, a déheute toute dusqu'à foère des falises éd sabe lo jusse édvant él vieuse ville pi sin clotcher...
A mzure éne colline, éne dune qua vient foère mumuse aveuc chés bieux nuages dé ch'bieu ciè dé l'Baie d'Sonme...
Du sabe coére pi dl'ieu toujours...
Chés batieux qui l'attin.n'nt té ch'flot... des moèsons qua s'érbéy'nt dins chl'ieu...
Du sabe por étreuver la mer, là-bos à ch'Cap Hornu pi à l'pointe du Hourdel...
Du sabe qui l'impêque chés batieux d'flotter...
Mais dsur chés prairies badgées éd sè, is sont tértous lo, à matcher pi rmatcher, chés bieux moutons éd prés salés qu'o z'ainme si tant vir dins l'Baie d'Sonme mais qu'o z'ainme si tant vir eussi dins nous assiéttes...